弱勢港男現象 (上)

弱勢港男現象 (上)

今日同大家玩下網上搜尋遊戲，如果輸入「弱勢港男」去search，你會搵到有一大串討論資料，不過如果輸入「弱勢港女」呢，結果幾乎等於無，呢個現象代表乜呢? 係港男壟斷網絡資訊呀? 定係港女無人同佢地辯護? 抑或港男已經去到一個無得翻身既地步，好似香港既貧窮現象咁，有隔代弱勢港男出現?

要定義弱勢港男，先要強勢港男，咁點樣至算係? 若以一般港女既標準，離不開要高學歷、好職業同高收入，以上三樣既相乘，再加上英俊、幽默同細心，具備晒以上條件，只要你老哥肚腩唔大過肥韜，高度矮唔過志偉，年紀高唔過賭王，D港女都會將你放入老襯(對唔住! 係老公至岩)名單之內。

下? D標準咁辣，咁香港咪九成九都係弱勢港男! 師兄! 你全中! 港女心目中，埋親身個D男仔，十個有九個都係弱勢，皆因佢地果個LV手袋裡面收埋左部四核心既隱形電腦，一有男仔追求，呢部腦就拿拿臨將佢由頭到腳運算一次。

港女首先會由你張卡片開始掃描，再評估你架車，再睇埋你對皮鞋，所有佢地都會計分，你地唔好唔信，我識得有位港女，試過特登走去停車位，睇下個男人揸乜野車，佢話呢D唔係現實，只係費事嘥大家時間，我都無說話好講。

就算佢對你有少少好感，但係一旦你唔爭氣，分數唔合格，港女都愛莫能助。佢响天性同理性上，都唔會同你鬥，俾機你，更無可能等你讀書、升職再加人工，好似以前D千金小姐等你考狀元咁。因為港女心態，青春同目標都有限，後生過自己果班妹妹仔仲好進取，所以唯有同你講，大家做下朋友，或者老土D，做你契妹，你就依然傻傻地咁充滿幻想，响人地身邊哄下哄下! 發白日夢!

所以師兄，如果你身邊有好多港女朋友，你咪高興住! 如果你仲身痕做埋人地「好多」契哥，又周圍認契妹，就仲大鑊。因為不知不覺間，港女已經用張無忌個招乾坤大挪移玩死你，等你一世無發球權追佢。

換句話講，檢查自己係咪「弱勢港男」，計下自己多唔多追求對象變左朋友既港女咪知囉! 唔好再成日以為自己人緣好，多異性朋友啦! 大佬!

轉載自20.05.2009 《am730》 專欄 港男達人 – 達人