弱勢港男現象 (中)

弱勢港男現象 (中)

各位師兄，前日睇完本欄之後，有無返去數下有幾多港女friends同契妹先? 數完蟲蟲有無十指陷髮，好鬼沮喪咁發現自己中左「弱勢港男」病毒呀? 又唔使騰雞住，好似豬流感咁，你有燒未必係H1N1，仲要同你做埋基因測試，先至可以確診，同上報「港男聯邦弱勢港男疾控中心」，成為病例架!

如果你有以下既徵狀，就好大可能係港男嘞：

1. 成日北上高興：我知道人性取易不取難，唔會怪你! 不過如果後生細仔，有港唔諗，一放工得閒就頻頻北上，放假前夕仲會過夜呢，師兄你就危嘞。仲有，你個人既自信心會隨住接近關口而上升，興奮度係過關之後達至高峰，人會精神左! 講野大聲左，甚至覺得自己靚仔左，想做「集郵男星」做既野，咁基本上你中左招架啦。

2.有埋北方女友：呢度講既北方，指羅湖橋以北，所有內地女子都算數，普遍佢地都會表面上容易結識，又千依百順，又好鬼溫柔，唔似D港女咁頂心頂肺，所以你會後悔上得去遲，返落黎會無咁怕D港女，開始有少少反抗，同多少唔志在添，咁你應該開始病發嘞。

3. 有固定北方女友：你一諗住當個女仔係正式女朋友，術語就叫「沉船」! 呢句野好正，形神俱似，不過我話俾你知，已經返唔到轉頭，師兄你會沉溫柔鄉，好似《天水圍的夜與霧》既任達華咁，失左常性，乜都應承。嗱! 唔係歧視，依我調查研究，有位弱勢港男同我講：「北妹除左多腳毛同唔剃胳肋底毛之外，身材同皮膚都好過港女多多聲。」

4.想係內地買樓：置業係人生大事，香港地打工仔好艱難至可以買樓，返到上去，人人都係大哥，個個叫你老闆，有女朋友然後買樓係必經步驟。你一計條數，辛辛苦苦死慳都唔夠追港女，係上面用黎供樓仲有找，就梗係二話不說就落訂啦。如此這般，你就決定放棄港女，立心革命，而每次北上，都有不少師兄弟同你一齊，用腳去投港女一票。

完成以上既潛伏、傳染、病發、產生抗體四大階段，傳說中既「弱勢港男」已經徹底變種，係內地演化成「強勢港男」，所以港女你地咪繼續嘲笑班港男囉，強定弱? 有時好吊詭既。

轉載自 22.05.2009 《am730》 專欄 港男達人 – 達人