弱勢港男現象 (下)

弱勢港男現象(下)

收到有對號入座既港男來信，話佢個case同上星期寫果幾個現象吻合，唔知自己屬於弱勢定強勢? 仲搞唔清楚我響度讚定踩有內地女友既師兄喎；佢仲指正我，有關「沉船」呢亭字眼係用響對歡場女子身上，不適用於良家婦女，用呢個term似乎有多少貶義添。

首先，我用「沉船」呢個字，意思只係講：對待感情由唔認真到認真，絕無其他意思，請見諒! 其實，我都有唔少朋友都好似呢位師兄咁，有D仲結埋婚生埋仔添，響上面生活唔差架。至於強定弱，係相對既，一切就好在乎自己心態嘞!

就好似大家對「港女」兩隻字既睇法一樣，你可以話係貶詞，但係俾人叫得「港女」，梗係又叻又靚又多人追果D啦，唔係就一早叫佢做「豬扒」啦! 你地眼見上電視彈港男果個補習妹都唔差，寫專欄叫老公俾晒份糧佢果位女主播都索架，所以稱得上「港女」絕對唔差!

而叫得自己「弱勢港男」既師兄，就更加高手，早已超然響港女魔爪之外，有張回鄉卡，等於有幪面超人變果條腰帶，港女永遠唔知道，亦唔會明白，港男響上面有幾高興! 至於北上快樂係唔係逃避? 我認為最好由班無拖拍無人追既港女去公投，好過鬥吹水。

你去放炸彈，響以色列當地叫恐怖分子，響伊朗咪係聖戰英雄囉! 所以港女嫁唔出咪話事業心強；港男尋歡都話去救國囉，呢D野邊度有公論架。但係正正係咁，我達人至要出黎講野，你地班港女成日以為我篤你，我既苦心你地又明唔明呀?

港女既處境，就係同香港響中國既處境地位一樣，遲早被取代同邊緣化。我唔係危言聳聽，因為一葉落而知秋，自從熊黛林呢位姐姐出現，佢肯博肯做同平靚正風格，已經擾亂model界生態，自從佢做埋天王嫂之後，就令人知道北方女仔有夢想成真既威力，唔係依家D港女可以匹敵!

港女當然又話人Cheap啦，話人老土又成身假野啦，但係佢大小姐睬你都傻，三扒兩撥已經上晒位，轉個身隨時學師姐章子怡，去埋荷李活發展，你地仲坐響度，自說自話，等人追兼等運到。

呢個唔係質素問題，而係心態問題，港女想要既野，係唔會係天跌落黎，你唔知驚，咪繼續以為自己不可取代囉!

轉載自 25.05.2009 《am730》 專欄 港男達人 – 達人